muhabbat محبت جی معراج لفظ
محبت!!!
محبت ،احساس ،پيار،....
اھي جيترا خوبصورت لفظ آھن ،
انھن جا اوترائي خوبصورت احساس آھن،
ھي سموري ڪائنات محبت تي مشتمل آهي ،
پر !!
ڪائنات ۾ رھندڙن لاءِ محبت لفظ جي الڳ الڳ معنا آهي ،
محبت لامحدود ھوندي آھي ،
پر ڪنھن جي لاءِ جسمن تائين محدود ٿي ويندي آهي ،
محبت جي معني ھر ڪنھن کي ايندي ناهي ،
پوءِ به ھي دنيا محبتن جي متلاشي!
ھميشه محبت کي حاصل ڪرڻ لاءِ آتي ھوندي آھي ،،
محبت لفظ ڪيڏو نه خوبصورت تصور آھي،
پر ھر ڪنھن جي حصي ۾ اھا خوبصورتي ملندي ناھي،
محبت ڪنھن کي ٽھڪ ته ڪنھن کي لڙڪ ڏيندي آهي ،
محبت ھڪ ڊگھو انتظار ۽ طويل تڙپ جو نالو به آھي،
ڪنھن جي لاءِ محبت عبادت ھوندي آھي ،
ڪنھن لاءِ محبت ڪرڻ گناھ ٿي ويندو آهي ،
ڪي محبت کي حاصل ڪري مڪمل ٿي ويندا آهن ،
ت ڪي سڄي زندگي محبت کان اڌھور رھجي ويندا آهن ،
محبت ڪائنات جي ھر شئي ۾ موجود ھوندي آھي ،
پر ھر اک ان محبت کي ڏسي سگھندي ناھي،
محبت،احساس ،پيار!!!
اڀرندڙ سج جي ڪرڻن ۾ به ھوندو آھي
ت لھندڙ سج جي ڌنڌلي شام ۾ ب ،
محبت ڪوھيڙي ڀنل رات ۾
۽ ان رات جي خاموش راڳ ۾
محبت پھاڙن مان وھندڙ آبشارن جي سازن ۾،،
۽ نديءَ جي وهڪري جي راز ۾
محبت گلڙن جي خوشبوءِ ۾
۽ ان خوشبوءِ مٿان ڦيرا ڏيندڙ پوپٽن جي رنگن ۾،
محبت جو خوبصورت احساس ڪنھن بکئي پيٽ لاءِ ماني ڳڀي ۾ به ھوندو آھي ،
۽ برسات ۾ ٽمندڙ اجھي جي ليپي ۾ به ھوندو آھي ،
محبت ڌرتيءَ لاءِ رت وهائڻ ۾ پيار بنجي پوندي آهي ،
محبت پنھنجي ماڳن خاطر آواز اٿارڻ ۾،
ھڪ خوبصورت جدوجهد جو بڻياد بڻجي پوندي آهي ،
محبت موئن جي دڙي مان اڏامندڙ مٽيءَ جي خوشبوءِ ۾ به ھوندي آھي ،
محبت جو پيار ڀريو احساس ماءُ جي هنج ۾ ملندو آهي،،
محبت،پيار احساس، جو ڪو به رنگ روپ ناهي
پوءِ به محبت ،پيار احساس ،،ھر رنگ ۾ موجود ھوندو آھي ،
محبت سڪل پنن جي اڏامندڙ سازن ۾ به موجود ھوندي آھي ،
محبت ھوا جي ھوڏ تي لڏندڙ لامن مان به جھلڪندي آهي ،
محبت فجر ويل پکين جي لاتن مان ايندڙ آواز روحن کي ھڪ الھامي سرور بخشيندي آهي ،
۽ رات جو آسمان تي ڪونجن جي قطارن مان محبت عيان ٿيندي آهي ،
محبت جي ڪا صفت ،شڪل صورت ناهي ،
پوءِ به جنھن سان محبت جو واسطو پوندو آهي!
محبت ان کي خوبصورت بڻائي ڇڏيندي آهي ،،
محبت جي معراج کي محسوس ڪرڻو آهي
ت اھا محبوب جي پھرين چميءَ ۾ لڪل ھوندي آھي..
Comments
Post a Comment